第一章：由葵司變成飛鳥鈴 (17年9月)
時間嚟到17年既9月，呢半年左右時間大慨開咗二十幾個惠比壽葡萄既post，內容亦都由淨係講葡萄成員，慢慢延伸到講埋其他AV女優。
當時既諗法係想以傾AV女優嚟做賣點，等入嚟既巴絲打都會慢慢傾下傾下，對葡萄呢隊組合有興趣，多啲人一齊傾開心啲。
而喺傾AV女優既過程入面，就開始有巴打上嚟分享去AV女優event既經歷。
喺9月份，葵司就有一個喺秋葉原既event，當時一見到公告一出我就已經決定要去，但面臨一個好重要既問題，就係買飛。
頭先上面既例子都有提到，AV event係有限人數，70個係基本盤，有時會更少，視乎女優當時有幾紅而定。
通常賣飛會喺event前一個月左右開始，如果鋪頭對個女優冇信心，有時會再早啲開始賣。
女優既Twitter，搞event既鋪頭Twitter，有啲會定時定候報返淨返幾多張既名額，賣哂既話亦都會放上Twitter，所以去之前又係要mon實，費事白行一趟。
而大部份既鋪頭都唔會有預約制度，你一定要親身落去鋪頭買碟，佢先會親手即場俾飛你。
當然最好就梗係早啲攞到張飛喺手最穩陣啦
之不過...
人就喺香港，點樣過去日本買碟
(女優響嗰段時間有event既話，有啲鋪頭會為咗方便啲客揀碟同促銷，會setup個靚靚仔仔既booth，等啲客一搵就搵到。
呢張圖係天使もえ嚟，出完event響個booth影相留念。)
正所謂出外靠朋友，之前入咗既葡萄FANS Group，入面就有人識人喺日本留學緊，可以嗰日去幫手買。
呢度要提提大家，搵朋友幫手買既同時，你要問咗人地介唔介意先。
始終入去AV鋪頭，唔係每個人都接受到
尤其係女性。
明查暗訪之後，我拜託咗嗰位喺日本留學既朋友幫手，響有飛賣既第一日就去幫手買。
點知...
鋪頭朝早10點開門，開門一個鐘已經賣哂飛，我朋友去到既時候己經係下晝5點固之然乜都冇，鋪頭亦都冇喺Twitter講已經賣哂，我朋友亦都白行一趟。
係，當紅女優就係可以咁誇張，大家都鐘意既桃乃木かな，就係秋葉原event女皇，佢既紀錄係：
鋪頭當日特登提早喺朝早6點開門賣飛，方便啲人返工，但排隊等開門買飛既人已經reach咗參加人數，當日既06:06AM，鋪頭就已經貼咗event完售既公告出嚟。
呢一個就係AV女優event既魅力。
(喺相沢南出現之前，桃乃木係秋葉原event女皇嚟。）
-- --
當時好彩我未買機票，因為我都有買唔到飛既心理準備，只係冇諗到個情況咁誇張，半日都冇就完售。
萬念俱灰之下，我喺AV Event網睇到同一日有另一個我都有興趣既女優都有event。
佢叫做飛鳥りん。
當時我對飛鳥既認識，就淨係知佢係SOD既女優，同葵司同一間事務所，片就睇過幾套，然後法官大人我已經冇補充。
諗返起嚟真係一個幾衝動既決定，當時我就係諗，是但啦還掂都係，咪當體驗下女優event係點，去試下囉。
於是，我就再一次拜託嗰位留學朋友，搵一日weekend再一次落去秋葉原幫手買飛。
至於買幾多隻呢...千里迢迢過到去，梗係有咁多玩咁多，俾哂3隻我！
因為搵唔返個event detail，我已經唔記得買2枚3枚有咩內容，但當時呢個event係買Blu-ray既話會送多一張2shot合照，我嗰時覺得隻碟買返嚟我又未必會睇，2枚3枚又已經有合照，慳返啲錢食咗佢好過，就叫朋友全部買DVD就算。
駛錢既野，最緊要量力而為我認我窮
-- --
確定買到飛之後，就開始去訂機票酒店，當時好似係預咗Total 5日左右既行程，event係第三日既事，前後有啲時間休息，等自己唔好咁趕。
出發之前最煩通常係諗送咩禮物，當時正值係中秋節，又想有啲香港特色，咁就梗係送月餅啦
當時根本冇諗過女優食唔食得呢啲野又或者日本妹食唔食呢啲野
好，上機出發了
我去秋葉原event既話，多數會住返秋葉原附近，上野係一個好地區，一嚟近老秋，二嚟出入機場都係一程火車搞掂，三嚟遊客區唔驚冇野食冇街行，四嚟多酒店揀。
到上野嗰時已經入黑，check in完求其醫肚，咁就完咗第一日。
-- --
之後就去買我去event要用既野信紙同簽名板
我每一次去event都會寫信俾女優，因為唔識日文，響event嗰陣基本上係溝通唔到，有野想講都唔知點講，所以我會寫封信，連埋份禮一齊送。
唔駛驚老土，好多去event既日本人都係咁做，因為event真係眨下眼就完，冇咩時間俾你同女優傾心事，寫信係最好。
簽名板就係女優喺簽名環節簽俾你用既板，上面提過有啲event係可以簽私物，簽名板就係一個好選擇，四四方方易收藏 ，都係好多event常客既必備之物。
數量嚟講，有兩場簽名就買兩張，如此類推，有啲鋪頭會準備埋俾女優，不過自己帶埋去就穩陣啲，反正又唔係貴。
(以上所有野都可以喺ドン・キホーテ，即係DONKI DONKI買到，間野又開24小時，日本周圍都有，自己去之前Google下。）
當晚就喺lobby做功課，將之前搵識日文既朋友幫手譯既信，人手抄返落去。
唔識日文既情況下，寫日文真係唔知自己寫緊乜，驚自己寫得肉酸既就最好搵識日文既朋友幫手，費事一陣女優睇到一頭霧水就唔好啦
而家睇返其實去完呢三年，寫啲日文都係冇咩進步，我仲記得嗰時俾fd睇，佢仲笑我啲日文字好似幼稚園學生
(信既內容就其實冇咩特別偏好，你鐘意寫乜都得，好似我呢度都係恭喜佢出道一週年，想見到佢同葵司合演，諸如此類。）
-- --
第二日起身就去咗中野Broadway，一個專賣模型玩具既大商場，而且當時仲有個目的，就係之前桃乃木嚟過呢度拍節目，所以專登過嚟朝聖一下。
(嘉賓係我到而家都係唔鐘意既三上悠亞
)
然後就返秋葉原行，上去秋葉原ラジオ会館睇葡萄既生寫真
哇葵司嗰啲仲係好貴
當時又未搵到新工
結果都係冇買到。
(一個個嗰啲係亞加力立牌嚟，之後既遊記會出現，到時再講。）
-- --
旅程既第三日，亦都係event既大日子。
當時喺葡萄post識到一個巴打又係呢幾日過嚟參加event，佢係去神咲詩織，都係喺老秋既其中一間碟鋪，大家相約咗到時一齊出嚟食個飯。
而當然唔少得，就梗係一齊行下AV鋪啦
難得有同好，一齊吹住水行AV鋪都不知幾開心
(睇人駛錢最開心
)
傾下傾下都差唔多到時間，大家分頭行事見女優。
我既人生處女AV Event鋪，就係老秋既MiS，之後嗰幾年我每次去老秋冇event都好，都會入去行下。
可惜最近疫情影響，今年年中佢已經結業。
屌你老母武漢肺炎
Event既樓層通常喺間鋪既頂樓，而MiS因為比較細，一層入唔哂所有人，大家都唯有喺後樓梯排隊。
當時第一個感受係，屌你冇後生仔既
個個都係中坑嚟，望落似後生既真係一隻手數得哂。
同埋有唔少都係西裝骨骨，白領上班一族，都係收咗工過嚟玩。排緊隊既時候大部份人都係自己做自己野，check相機，玩電話，同同行既fd吹水，大家唔會尷尬，唔會覺得去見AV女優係一件好失禮既事，成件事好自然好平常，好似你去超市排隊買野咁。
說時遲那時快，event開始，排得前既可以入去間房仔先，我好好彩係頭十個左右，唔駛企得太後。
AV Event通常都會有個主持搞下氣氛，同大家講返有咩要注意等等。有時係女優既經理人，有時係碟鋪既職員，有時係請返嚟專做主持既主持仔。
今次呢個MC就係啲主持仔嚟，之前喺Twitter見過佢主持其他女優既event，所以有印象。
Blibala咗幾句(因為我聽唔明)，大家開始拍手，我又跟住拍，飛鳥就喺後台行出嚟。
(示意圖，呢個係佢嗰日前一個event既水著。）
我仲記得見一個AV女優真人既第一個感覺，就係真人靚過上鏡好多。
一個你之前只係隔住個mon見到既人，而家活生生喺你眼前，講緊野，你以為日本AV女優同你隔得好遠，但原來只係一張機票，幾隻碟，你就可以見到佢企喺你眼前。
有少少似見到明星既感覺，震撼、驚喜、同時又開始對之後會發生既野感到緊張同不安。
我...一陣會同個AV女優...傾計影相？
-- --
飛鳥出嚟同大家講幾句，主持又附和幾句，大家哈哈哈，我又陪住哈哈哈，之後event就正式開始。
呢度俾個提示大家，如果你唔識日文又唔知流程去到邊，最好就係睇你前面既人點做。
因為大家都係參加緊同一個event，個流程一定係一樣，做既野都係一樣，只係買得多與少既分別。
唔識既唔駛慌唔駛怯，留意排喺你之前既人點做，你跟住做就實冇死。
頭先講過我係排大慨頭十既位置，因為AV event參加劵既No.只係用嚟睇人數，同開始event既先後次序無關，你排隊排得前啲，就你開始玩先，就係咁簡單。
頭先講過間房好細，入唔哂咁多人，所以有啲人係睇完飛鳥講野之後，就出返去後樓梯排隊
而我就開始觀察排喺我前面既人點做，哦首先有人過嚟睇下你張飛買咗幾多隻...原來三個三個咁出去影...影完就埋位簽名...
題外話，其實有唔少日本人係買一隻就算，我地咁遠搭飛機過到去就梗係想玩盡啲，但人地日本當地人好多都唔係咁諗。
可以同大家講，同女優影合照啲pose真係五花百門，我嗰日真係大開眼界。
最犀利既，係我親眼睇住有FANS要求影呢個pose。
(俾飛鳥踩住呢個就係嗰日既主持，我搵唔返佢Twitter，唔記得叫咩名，佢個形象就係著浴袍戴黑超。
呢張相係我事後響鋪頭Twitter save低既。）
睇相遠遠唔及自己親眼睇，原來日本人真係咁M，真係會有人要求女優咁樣影合照
真係大開眼界。
排下排下終於到我，攞住部相機同另外兩個人行出去，比之前再近距離望真啲，真人真係同睇片個感覺唔同。
咔嚓咔嚓影完嗰一分鐘，都仲未有時間睇下影成點，就已經叫你埋位俾女優簽名。
以下就係我同飛鳥第一次既對話，當然全部都係日文，都係之前搵個fd譯定，盡量學下講。
我＝ 飛鳥＝
我：第一次見面，我喺香港嚟
飛鳥：......香港...犀利...你好
我：Er...我唔識日文 ...今次帶咗份禮物俾你 （攞盒月餅同封信出嚟)
飛鳥：哦！多謝！
之後我就攞簽名板出嚟，佢首先問我叫咩名，我打開我個Twitter佢睇，因為我個username有哂我英文名同日文拼音，方便佢睇。
飛鳥望一望，就開始寫我個英文名落去，當時因為我未搵到新工，就叫飛鳥可唔可以寫啲鼓勵我既說話，當然又係搵fd譯定呢幾句啦，不過太長唔識用日文講，我直接成篇copy喺手機隊俾佢睇。
飛鳥又係望一望，笑住同我講OK，就開始低頭寫。
而呢一張，亦係我人生第一張女優既簽名板。
-- --
咁就梗係要同大家分享下啲相啦不過我會落個水印，希望大家唔好介意
同埋嗰時影相好鬼渣，有唔少都對唔到焦，之後出嗰啲遊記影既會好啲，請見諒
我要強調唔係飛鳥唔靚，係我影得差喳
(嗰時皮膚係差啲既，不過呢啲又係睇真人先會知，平時睇啲美肌相係永遠睇唔到。)
-- --
一個event最緊要既，之前都講過梗係張合照啦。
當時第一次去唔識，見人地合照影即影即有又跟人影，後尾再去event都好少再咁做，因為真係影出嚟唔靚，不過攞嚟放銀包係OK既。
當時亦都唔識同佢講影咩pose，大家V字手勢就算。
去到後期啲event我已經進化哂唔影呢啲老土pose
想知就一路追post追落去
又一個小貼士，如果合照影衰咗，譬如閤埋咗眼又或者pose遮住個樣，係可以request再影過，不過要喺staff面前del咗舊嗰張。所以用相機影就最好，即刻可以知有冇問題。
我就勸大家唔好諗埋哂啲影完扮del再影既屎橋人地女優同staff都唔係第一日出嚟做野，都知你諗乜，到時俾人鬧就盞自己瘀麻煩唔好影衰香港人
(Event影合照係可以揀即影即有，你都可以帶即影即有相機響攝影section嗰時用，不過你影一張又要等張相紙碌出嚟，人地揸相機嗰啲已經影咗3-4張，抵唔抵就自己諗。）
-- --
搞掂哂，初體驗之後就離開個會場，我買3枚既特典就係有得影水著同再多一張合照，連埋之前嗰張total有3張。
於是我就問staff幾時返嚟影水著，尷尬既時候嚟喇。
我：When...should I...come back? (唔識日文唯有講英文）
Staff：...?
我：！？Er... (攞個google translate出嚟打打打，之後俾佢睇。）
Staff：哦！#*$^#*$^#&*$^!
我：...?
最後Staff攞咗本簿，響個白紙上面寫18:30俾我睇。
真係好柒![[sosad]](https://cdn.lihkg.com/assets/faces/normal/sosad.gif)
結果之後我返去第一時間學日文數目字同時間係點講
-- --
落到樓個感覺有少少唔實在，一直期待既AV Event，原來就係咁既一回事，有唔少都係自己預期，因為之前都睇過去過既巴打分享；亦都有啲驚喜，知道原來成個event氣氛都好輕鬆，大家真係抱住見偶像既心態去玩。
有一種上咗一課既感覺
喺條街度閒逛 ，咁啱之前去神咲詩織個巴打都完咗私服嗰part，大家約出嚟喺附近交流返頭先既經過同心得。
兩個香港人，喺秋葉原街頭交流去完AV Event既心得，成件事好好笑，但又好開心好滿足。
眨下眼到咗18:30，大家又分頭行事，我又返去見飛鳥。
AV女優著起水著，真係不得了。
（呢啲唔係肥！係叫Baby Fat！）
又可以同大家講，當你身處喺event當下環境既時候，其實你係唔會有咩生理反應。
起碼呢幾年我去過咁多次event，同女優合照，影女優，女優著cosplay三點式，我都冇咩性興奮既感覺。
可能event個現場氣氛真係好歡樂，大家講講笑笑，輕輕鬆鬆，都唔會有咩淫念走到出嚟。
不過呢個都係我個人經驗同睇法，如果將來你去到現場，個AV女優企你隔離你有反應，唔駛擔心，你都好正常
返番嚟event，影完水著之後又到合照環節，今次我就同飛鳥做個砌心既手勢，大心心細心心，每樣一張
影完走既時候，飛鳥同我講咗幾句，我淨係聽得明「香港」呢兩個字，而家諗返可能係問我係咪聽日走，返去既路程小心啲之類。
落到樓，握完手既餘溫，影合照嗰陣飛鳥挨埋嚟既觸感，依然存在住，個感覺好得意。原來AV女優，真係唔係諗得咁觸不可及同咁神秘。
我亦都好順理成章咁，沉咗船
-- --
完哂所有event，我又約返嗰位今日一齊上戰場既巴打，我想佢幫我一樣野。
我同佢講，葵司個event間鋪喺附近，你可唔可以幫我喺樓下影張相。
於是乎，就有一張咁既相。
(世上最遙遠既距離，就係你鐘意既女優響上面有event，而你冇得去。
事後我先知呢間鋪event唔係喺鋪頭度搞，另外有地方，又柒一次
）
當日葵司得私服，冇水著，兩套衫都好靚。
唉
我又冇份去
嬲吖
(葵司當日既其中一套衫)
-- --
嚟到旅程既第四日，我去返葵司event嗰間鋪，睇下有冇啲AV連即影即有相賣。
又一個小貼士俾大家，平時event開始之前，同換咗衫/水著之後，碟鋪staff會同女優影即影即有相，之後擺喺自己鋪頭既AV度一齊賣。
所以大家去完event之後，第二日不妨再落多去間鋪頭一次，可能搵到唔少靚相。
嗰日葵司完event，第二日去就見到佢啲AV入面有夾住佢啲即影即有相賣。
嗯？有兩張喎，標準答案就梗係買哂兩隻碟全都要啦
不過...當時未搵新工真係唔敢亂駛錢最後淨係買咗一隻![#[bouncer]#fs](https://cdn.lihkg.com/assets/faces/fs/bouncer.gif)
大家呢樣唔好學我
錢可以再搵，呢啲相唔係幾時都有
最後我每次去日本去完event，都會喺Twitter po返呢程買咗邊隻AV，tag返個女優，等佢知道有FANS支持佢。
然後內容可以打幾句「辛苦了」「下次再見」，貼返你同個女優既合照，等女優對你印象又深啲。
呢招我經驗都係萬試萬靈，女優派like既機會率差唔多有八九成。
當然都有啲女優冇用Twitter，好似葵司咁，最後我tag咗佢事務所8manpro
而事務所同飛鳥都有like我個po，算係劃上一個完美句號。
就係咁，第一次既AV Event之旅就完滿結束
延伸閱讀：
序1 無端端點解會走去追AV女優 + 序2 AV Event的前世今生
沒有留言:
張貼留言