(原文於21-12-2022 hksecretparty刊登
https://hksecretparty.com/2022/12/21/2022年av業界大事回顧（上）/)
大家好，我係新東寶，先喺度預祝大家聖誕快樂同新年進步。
今年都差唔多接近尾聲，又係時候同大家回顧下今年日本AV業界發生嘅幾件大事。啱啱睇返原來今年已經係我第4年喺連登成人台寫大事回顧，啲人成日話想放棄嘅時候就諗下當初點解開始，但我真係唔記得當初點解會開始。所以都係嗰句肉麻嘢啦，多謝大家呢幾年嚟嘅支持同唔嫌棄，小弟先至捱到今時今日，無言感激。
今年可以話係業界最動蕩嘅一年，捱過奧運，捱過疫情，冇估到仲有個AV新法；有人引退，有人做一姐；有人以為除多啲就會有人睇，點知出嚟嘅反應令人意外；有新人入行，又有舊人去拍無碼。差唔多每一日業界都有唔同嘅新鮮事，好睇過香港娛樂圈。
以下就同大家一齊重溫今年嘅業界大事。
1. AV新法利與弊
喺今年6月14號，日本政府正式通過「AV出演被害防止‧救済法」法案，簡稱「AV新法」，呢一條新法嘅成立直接影響到每一位喺AV業界工作嘅人員，立法只係簡簡單單閂埋門舉下手就做完，但後面延伸出嚟嘅係一連串嘅工作安排、運作、同人手問題。
關於AV新法嘅詳細條款，大家可以睇返小弟之前寫過嘅一篇懶人包：
2022年日本AV新法 懶人包
https://suntungbo.blogspot.com/2022/06/2022av.html
令業界最難適應嘅，除咗係一堆繁複同埋只有形式意義嘅文件流程之外，唔能夠好似以前咁臨時更換演出人員，同埋作品可以喺拍攝之後被演員無條件申請落架，呢兩樣嘢都令到業界人士喺一時之間方寸大亂。
（淨係概要都咁長）
新法實行之後，只要有一個主演嘅男優或者女優喺拍攝當日嚟唔到現場，唔理係因病倦勤，定係專登射波，當日嘅拍攝安排就要重頭制訂過，因為新法唔容許片商做任何簽約後嘅內容更改，包括重新排定拍攝日期，所有步驟要由簽約開始重新開始；就算作品順利拍攝完成，喺之後嘅幾個月冷靜期，喺作品入面出演過嘅任何一位演員，都可以無條件申請唔俾作品上架，而且片商同事務所都唔可以向嗰位申請落架嘅演員追討任何賠償。
對於呢一個每一日都訊息萬變，以及難以預測嘅AV業界嚟講，呢條新法令佢地失去咗以往喺人手安排上嘅彈性，以及要面對隨時要將作品無條件落架嘅風險。
（業界發起嘅簽名運動，直至今日收集到大概5萬個簽名反對AV新法）
跟著落嚟同大家總結一下AV新法對於唔同工種嘅AV業界人員有咩影響。
首先係企劃單體女優，由於企單女優一向都係以「量」取勝，AV新法實行之前可以一個月拍十幾套新作，新法實施之後由於文件上嘅工序同出片檔期上嘅新安排，喺人手上嘅調配安排比以前更難，令到企單女優嘅工作大減，有唔少企單女優都喺Twitter大呻冇工開。好彩嘅企單女優一個月都仲有3-4個job，更多嘅女優係連一個job都接唔到，新法實行咗半年，嚟到12月嘅今日，呢個情況依然未見有好轉。
工作量減低、失去咗可以臨時替補嘅工作機會，導致收入大減，令到唔少本來已經喺中游位置浮浮沉沉嘅企單女優萌生去意，有啲決定提早引退收山，又或者轉投去FC2市場工作，又或者開Fantia等等尋找額外收入。
企單女優係AV新法之下最受影響嘅一撮業界人士，同樣受到牽連嘅仲有同企單女優相同性質嘅所有AV男優，佢地都需要面對工作量大減同埋失去臨時替補崗位嘅問題，兩者可以話係同病相連。
（ 今年下半年明顯多咗企單女優宣布引退，雖然唔會寫到明係因為冇工開所以唔做...不過基本上都會令人聯想到唔多唔少都同新法成立有關。）
而另一邊嘅專屬女優，由於一直以嚟佢地每個月嘅產量都只有1-2套，對於每個月只需要工作一兩日就可以安心等收錢嘅佢地嚟講，AV新法對佢地冇乜嘢太大嘅直接影響。只要能夠確保預定好嘅拍攝日期有空檔，自己嘅身體冇任何「忽然」嘅大礙，當日能夠順利出現喺拍攝現場，專屬女優喺工作上基本上同新法實施之前冇任何明顯分別。
（今年踏入6週年嘅三上悠亞）
唯一一樣專屬女優要面對嘅問題，就係AV新法實行之後，片商喺安排推出新片日期上面所出現嘅空窗期。AV新法規定作品拍攝之後需要有4個月嘅冷靜期，亦即係話女優拍攝好嘅作品要等4個月之後先可以上架，有唔少片商喺安排日程上就出現混亂，導致有啲女優明明拍足咁多套，9月同10月都有新作，嚟到11月突然冇片出，然後12月又有返新作嘅詭異情況。
（10月頭嘅時候，石川澪連自己下個月原來冇片出都唔知，後來片商喺Twitter同佢道歉，話因為新法問題檔期要延後）
片商同事務所喺AV新法實行嘅呢半年期間，安排都相當混亂，甚至連女優本人有時都搞唔清楚自己邊個月有新片邊個月冇新片，缺乏妥善嘅安排同溝通上有遲延，都令到2022年成個下半年嘅新片檔期相當多意外，有好多專屬女優都出現「斷片」嘅問題。好彩嘅係呢個混亂期隨著片商同事務所適應咗新法之後有所改善，喺2023年應該就唔會再出現呢種情況。
而片商同事務所要面對嘅，就係要重新制訂拍攝上嘅各項條文同合約，確保每一位旗下嘅女優喺拍攝當日都可以乖乖地順利出場，拍攝完之後又唔會扭計反口要將作品落架。對於本來就已經充滿不穩定性嘅業界嚟講，而家片商同事務所要比起以前更加關注女優嘅身心健康，加強照顧女優嘅意願，儘量減低女優出現問題嘅機會。
（今年7月喺Ideapocket出道嘅新人明日来ひかり（明日來光），只係拍咗一套作品就宣布引退，然後過咗一陣佢個大名就出現咗喺啲AV女優風俗場所度）
喺新法實行之後嘅呢短短半年，就已經發生咗一兩件收到出演人員申請，而需要將作品落架嘅案件，先唔講有冇可能係有心人士插手，安排暗樁嚟證明新法嘅作用。以大局嚟講，AV新法嘅成立的確係保障到一班俾人哄騙下海，同埋喺拍攝過程中遇到不愉快對待嘅年輕女仔，可以俾佢地有後悔嘅選擇。只係喺工作彈性上、人員安排上、同埋冷靜期長短呢幾個層面都有再相榷嘅餘地。
例如會唔會喺有人倦勤嘅時候，容許片商有臨時更換選人上嘅安排，而又唔需要再重新制訂合約，又或者可以製訂一份有效嘅臨時合約，正式合約可以後補；冷靜期可以因應拍攝內容而有所調整，容許有第二個拍攝日程嘅安排等等，我覺得都可以令到呢條新法實施嘅本意更加明確同貼地，而又唔影響業界嘅正常運作。
嚟緊2023年，AV新法應該唔會取消同撤回，但有機會會見到出現一啲小修改，大家有留意Twitter嘅話都會見到有例如好似天使もえ（天使萌）嘅現役女優，出嚟帶頭希望大家關注AV新法對業界嘅同仁帶嚟嘅問題同困擾，亦都有同議員會面，希望可以將業界真正嘅聲音帶入議會，希望可以改變AV新法所帶嚟嘅問題。
（大家姐天使萌落街親自派傳單）
不過嚟到2023年我相信大家都對呢啲只睇選票利益嘅政治有自己嘅一套睇法，成效有幾高，我相信大家都心中有數，即管睇下業界同AV新法最後會唔會握手言和啦。
（片商本中最近就話已經慢慢適應AV新法嘅改變，拍片嘅工作數量慢慢正常返。）
2. Moodyz嘅一姐大亂鬥
片商Moodyz今年經歷咗一場非常精彩嘅人事變動，首先係高橋しょう子（高橋聖子）喺今年5月閃電引退，所有影迷都俾佢殺到一個措手不及，而且高橋嘅引退冇做任何大肆宣揚，亦都冇其他相應嘅大型活動催谷，高橋就喺一個非常平靜嘅氣氛之下，結束佢6年喺業界嘅女優生涯。
（高橋當時仲特登拍咗一條十幾秒嘅短片去公布呢個消息）
隨著高橋嘅引退，Moodyz一姐嘅寶座宣告懸空，FANS之間開始談論有邊一個女優有資格問鼎呢個寶座，當中以七沢みあ（七澤美亞）嘅呼聲最高，除咗因為人氣同銷量都有目共睹之外，另一個競爭對手水卜さくら（水卜櫻）因為有病在身，片量喺過去呢一年都非常唔穩定，令到七沢喺呢場一姐大戰之中贏面更大。
（Moodyz嘅小惡魔代表七沢みあ）
（條頸以下搵唔到弱點嘅水卜さくら）
喺呢個時候，坊間開始流傳業界第一美腿，喺FALENO入面虛度緊光陰嘅橋本ありな（橋本有菜）有想跳槽嘅打算。基於佢本人喺業界嘅地位同名氣，所有FANS都傾向佢會回巢返去WILL集團旗下嘅三間大廠，S1、Moodyz、Ideapocket嘅其中一間。
當時坊間一開始傳言係Ideapocket已經同呢位長腿姐姐達成初步共識，後來Moodyz因為高橋嘅引退舉動所刺激，都對橋本表示相當有興趣，於是就形成咗一場Ideapocket同Moodyz兩間片商之間嘅鬼打鬼搶人內戰。
（3月嗰時嘅橋本ありな）
Ideapocket入面仲有相沢みなみ（相澤南）、桃乃木かな（桃乃木香奈）等等一線人氣女優，以橋本而家嘅條件，入到去無疑又要同一班𡃁妹爭妍鬥麗，再加上已經有相沢みなみ呢一位仲係現役嘅「最優秀女優賞」得主坐陣，加盟之後嘅日子未必可以比喺FALENO嘅時候更加搶眼。
相反，如果轉投錢更多，資源更豐富嘅Moodyz，除咗只有七沢みあ呢個矮妹比較有威脅之外，其餘新人女優都未成氣候，就算係新人王石川澪都起碼要多兩年先至有機會追得上橋本喺S1時期已經開始建立嘅成績；而且仲有一個新鮮滾熱辣嘅Moodyz一姐寶座任坐，到時可以同另外兩位同樣都係女優賞嘅得主三上同相沢，喺各自所屬嘅片商入面平起平坐，喺業界入面更加有面子。
（相沢暫時都仲係最「新」嘅最優秀女優賞得主）
（橋本移藉去Moodyz之後嘅第一張宣傳相）
就係咁，橋本喺FALENO坐咗3年之後，一聲唔該借借都冇就返嚟坐咗喺Moodyz嘅一姐皇座，接棒高橋しょう子，成為片商嘅生招牌，呢兩位分別喺2018 DMM成人大賞攞過大獎嘅女優，被命運安排承接同一個一姐頭銜。
而因為橋本轉投另一間事務所，需要改一個新嘅藝名重新出發，新名叫做新ありな（新有菜），以橋本嘅講法就係「只有名字改變，內在仲係嗰個大家熟悉嘅橋本有菜」，以一個帶有少少Fresh嘅感覺繼續喺Moodyz拍片俾大家睇。而新有菜喺Moodyz嘅表現亦都冇令大家失望，暫時喺Moodyz嘅3套作品都相當出色，大家終於見返一個正常嘅業界第一美腿，唔駛再忍受FALENO嗰啲睇到人一頭霧水嘅作品。
未來嘅新有菜同Moodyz，會有啲咩新企劃同活動，將會係2023年嘅一個注目焦點。
（MIDV-234 「今イッてるから動いちゃダメぇ！」状態でも14400秒イカセ続ける！！ 新ありな）
3. AV女優在港賣淫被捕
講完兩單喺日本國內嘅業界大事，講一件同香港有關嘅女優新聞。今年10月，香港警方喺油尖旺區進行掃黃行動，當中拘捕16人，其中有一位係日本人，而且仲係一位現役AV女優。
據報導所講，被捕嘅AV女優藝名係「愛沢のあ」（愛澤乃亞），27歲，經中介介紹嚟香港，而中介就透過Telegram群組進行招客，每次服務收費大約6000-7000蚊，中介再抽取6-7成，最後呢位日本女優因為違返逗留條件，被法庭判處兩個月嘅監禁。
（XVSR-515 上・京・物・語 東京デビューからのAVデビュー 愛沢のあ）
過去幾年，一直都有唔少人表示知道有邊個邊個女優嚟咗香港開工，做緊幾多錢等等嘅「小道消息」，喺成人界別可以話係見慣不怪，但好似今次咁搞到咁大件事，而且有女優因為咁樣而被捕，就非常罕見。
同時亦都帶出另一個問題：就係AV新法實行之後，有唔少女優轉投，甚至係重投風俗界搵錢，當中亦有人唔介意遠赴海外市場，不過相信經過呢單新聞之後，日本嗰邊對外嘅「輸出」都會稍為收歛一下，而且今次呢件事俾我一種「黑吃黑」嘅感覺，喺查出邊個報寸同搵人出嚟祭旗之前，各位風俗界嘅同好睇嚟都係買張機票過去日本玩會開心啲同安全啲。
未完待續。
沒有留言:
張貼留言