何不食肉糜？關於女優選擇拍AV嘅迷思，以及2024年嘅個人總結。

  (原文於28-12-2024 hksecretparty刊登

https://hksecretparty.com/2024/12/28/何不食肉糜？關於女優選擇拍AV嘅迷思，以及2024年嘅個人總結。)

仲有幾日就迎接2025年，業界依然帶俾我哋一個又一個震撼彈，最近業界最多人討論嘅新聞，就係即將喺S1出道嘅新人瀬戸環奈，170cm高，J Cup嘅身材，前寫真女優嘅身份降臨AV業界大殺四方，相信2025年業界又將會係繼續腥風血雨嘅一年。

喺網上見到有唔少方向嘅討論，其中一個都係唔少人睇到寫真女優，又或者身材姣好嘅女演員偶像，下海投身AV業界之後嘅反應，就係「點解會嚟拍AV？去做Onlyfans（下稱OF）賣相，又或者Fantia開下直播唔係都搵到差唔多嘅收入？點解要除晒俾人睇蝕？」

今年嘅最後一篇專欄，就同大家講講我對於呢個世紀疑難嘅睇法。

SONE-614 新人NO.1 STYLE 最強ヒロイン瀬戸環奈AVデビュー

---

首先要知道，AV業界喺日本已經係一個相當成熟嘅行業，甚至喺好多人眼中，同一般嘅「正行」冇咩分別。喺業界嘅工作人員會受到法律嘅監管，可以享有法例嘅保障，亦有唔同嘅事務所聯會同工會監察，確保女優、男優、工作人員等等嘅安全同福利（當然點都會有害群之馬），喺各項安全層面上，都有一套相當完善而成熟嘅系統去處理同解決一旦不幸出現嘅種種問題。

賣相、OF等等嘅搵錢途徑，大多都係由自由工作者一人隻手包辦所有前期到後期嘅工作，法律上亦都冇為佢哋提供明確嘅監管同保障。簡單嚟講，缺乏白紙黑字嘅條文，當去到涉及法律問題、例如出現欠薪，追討層面等等糾紛出現嘅時候，賣相賣片嘅自由工作者無法得到同AV女優一樣相同嘅保障，只能夠靠自己處理同善後，同時缺乏法例監管嘅情況下，亦都容易令居心不良嘅人士乘虛而入，導致難以估計嘅損失。

香水じゅん同石川澪，兩位都係各自所屬事務所嘅掌上明珠。

最近轉投新事務所嘅kawaii*專屬女優ひなたなつ，由於舊事務所Fourty Four Management仍然拖欠佢唔少薪金，經常見到佢喺X（Twitter）炮轟前東家嘅營業手法非常有問題。

喺工作性質方面，好多人都會覺得拍AV等同俾人睇晒全相，同OF嗰種點都唔會去到全裸，多多少少都仲有一布之隔嘅「距離」，始終都係存在好大嘅差異。

嚟到2025年，好多年輕日本女性都已經對呢個觀念相當睇得開，AV女優已經唔再係一個咁羞於開口嘅職業，再加上隨住網絡嘅發達，AV女優同其他正統行業之間都出現唔少合作，業界好多資訊同消息都變得越嚟越透明。喺鏡頭前全裸而產生嘅隱私同危險問題都漸漸受人關注同理解，再加上透過馬賽克嘅「保護」，令入行嘅女性心理上更加容易接受，同時亦都令社會大眾對於呢個行業嘅有色眼鏡越嚟越少。

華人社會普遍都係對女性有著一種傳統嘅偏見，認為俾人睇過全相嘅女性就係污穢、不潔嘅象徵。但隨住社會開放，華人嘅接受程度都開始日益開闊，拍過AV，俾人睇過全裸身體嘅女性，係咪真係咁令異性卻步，唔敢同佢哋展開婚姻家庭關係，嚟到今時今日呢個問題嘅答案已經唔再係絕對，亦都有唔少引退後嘅女優都搵到好人家，展開新階段嘅生活。

呢幾日喺台灣舉行嘅TSE成人台灣寫真博覽會，規模同聲勢都冇TRE咁強勁，但依然稱得上係星光熠熠，係近年最成功嘅海外成人展之一，亦為參展女優帶嚟唔少海外嘅曝光同工作機會。

當然最重要都係一字記之曰：錢。三上悠亞、明日花キララ（明日花綺羅）等等由AV女優轉形成為時裝名人、網紅等等嘅成功例子，都係吸引年輕女性踏入業界嘅誘因。幸運嘅話，喺業界辛苦工作大概五六年，可能就已經搵到普通打工仔十年以上嘅人工，仲未計算在役期間帶俾女優嘅名氣，有機會出國外遊出席各種活動展覽帶嚟嘅收益同熱度，呢啲都係AV業界呢個相對成熟嘅行業生態圈，所能夠帶俾佢哋嘅機會同際遇，亦係單靠OF同Fantia等等平台比較難達到嘅成就。

引退之後嘅女優，有啲甚至嫁咗人成為人母都好，都仲會繼續經營一個小小嘅Fans Club，維持一定嘅熱度，同時又可以留住在役期間儲落嘅Fans，繼續為自己嘅婚後生活同家庭嘅開支做一個支援，對佢哋嚟講百利而無一害。

三上悠亞、明日花キララ係唔少日本女性心目中嘅時尚達人，除咗各自有自己嘅時裝化妝品品牌，亦都喺唔同嘅女性日用品廣告經常亮相，曝光程度相當活躍。

已經係兩子之母嘅引退女優園田みおん（園田美櫻），引退後創立嘅Fan Club已經係佢現時其中一個收入來源。

無論係AV女優，定係拍OF Fantia嘅網紅，都有自己嘅一套諗法同計劃。只要唔涉及偷呃拐騙，大家明買明賣，消費者亦都自然識得貨比三家，去衡量內容提供者嘅付出值唔值得自己嘅回報。作為觀眾同消費者，我覺得只需要尊重佢哋嘅決定就足夠，喜歡啱睇就去支持，反問佢哋何不食肉糜，有少少踐踏他人自尊，同埋干擾生活嘅侵犯意味。無論係拍AV定係拍OF，佢哋都只需要向佢哋自己嘅身體交待，無需要理會公眾嘅質疑同嘲諷。

喺呢個到處都講求私隱度，少少事就容易被人放大上綱上線嘅年代，每一位敢於坦蕩蕩喺公眾面前，展露自己最隱私嘅一面嘅人，都需要莫大嘅勇氣同能夠承受社會目光嘅強大抗壓力，我哋嘅目光只需要專注喺佢哋嘅工作成績同作品身上就足夠，剩低嘅就交由佢哋自己個人選擇啦。

電擊引退後轉形成為DJ嘅前女優相沢みなみ（相澤南）。

2024年嘅最後一篇專欄，喺呢度就完滿結束。今年喺HKSP同LIHKG一共寫咗18篇專欄文章，4篇大大小小嘅遊記，喺X(Twitter)上面亦都開始寫一啲儘量精簡嘅AV新作短評，喺呢一度除咗多謝各位巴絲打以及讀者過去一年嘅不離不棄同支持，亦都再一次多謝HKSP嘅支持同信任，不經不覺已經合作咗三年，風馬牛不相及嘅兩個成人界別可以維持一個咁良好嘅合作關係，唔多唔少都係一個難得嘅緣份，來年繼續請各位哥哥姐姐多多指教。

今年對於我嚟講係充滿風風雨雨嘅一年，好多新刺激同新嘗試，結識咗唔少志同道合嘅新朋友，實踐咗一啲一直以嚟只係喺腦海入面嘅構想，了解多咗自己嘅不足，同時亦更加了解多咗外界對自己嘅睇法同諗法；香港嘅世道一日比一日混亂同複雜，今年每當做完一啲決策之後我都會反思自己有冇行差踏錯，託大家嘅鴻福，暫時都冇做出令自己後悔嘅決定，呢一個都係我今年最心滿意足嘅一點。就好似球隊龍門直到季尾都冇失一球咁，保持一個clean sheet，係我今年最大嘅成功。

能夠堅持自己一直以嚟嘅信念同諗法，喺呢一條曲折離奇嘅人生道路苦苦漫遊，雖苦悶但滿足，呢種苦悶嘅自我滿足可能就係我嘅忍道；最近聽到一句說話，「彎路都係人生嘅一部分」，我一直相信上天冥冥中對每一個人嘅際遇都已經有最好嘅安排，學老人家話齋「食幾多著幾多都係整定」。新一年，但願我哋都能夠喺呢一條整定嘅道路上，繼續保持自我之餘，發揮同綻放屬於我哋嘅光芒，喺呢個浩瀚嘅世界留低我哋微不足道，但偉大無比嘅痕跡。

再一次多謝各位喺2024年嘅支持，留名2025年再見。