(原文於28-5-2023 hksecretparty刊登
https://hksecretparty.com/2023/05/28/台北隱世正版av店/)
喺5月小弟遠赴去到台北參加AV女優攝影會，除咗相機記憶卡同一雙眼晴都滿載而歸之外，另一個重要任務就係同幾位住喺台北嘅朋友聚舊，疫情呢三年大家都過得唔容易，而家難得可以聚首一堂食一餐美好佳餚，暢談呢三年嘅苦水同困境，大家盡訴心中情之餘又繼續展望將來，都係我喺呢趟旅程得到嘅美好回憶。
而喺台北市中正區入面有一間店鋪，小弟喺出發前就已經約好要同老闆聚一聚舊，原因無他，因為佢地係喺日本以外嘅華人地區入面，暫時唯一一間得到日本正式授權，售賣正版AV嘅店鋪。
講到小弟同呢間店鋪嘅淵源，就要由2019年疫情前講起：當年小弟仲係學藝未精，想向各方高手請教AV業界嘅各種奧秘，於是就斗膽拜託一位熟知日本AV業界嘅台灣朋友，請佢帶小弟拜訪一下呢間只係聽聞過，而從未見過盧山真面目嘅神秘店鋪。
同日本人合作過嘅朋友相信都知道，日本人做事大多數都非常謹慎同小心，特別喺AV呢一門敏感嘅行業，更加唔會輕易對海外投以支持；所以小弟一直都好想知道，到底係啲咩驅使到日本方面會決定喺台灣開設第一間正版授權店鋪，老闆做咗啲咩承諾先令到呢件事成真、喺台灣經營正版碟鋪又會遇上啲咩難題，同日本方面嘅合作又有啲咩技巧等等。
（呢張係小弟喺2019年第一次到訪店鋪時候嘅門面）
（由日本IPPA協會認證嘅正版店鋪，鋪外面亦都有相關嘅反盗版標語）
於是小弟就認識到老闆左哥，左哥係一位相當有頭腦嘅生意人，對我呢位外來客人非常熱情，分享咗好多佢嘅經驗同經歷俾我聽，例如日本對海外嘅態度其實唔係諗得咁刻板、初期喺台灣經營嘅時候被有勢力人士搵上門尋仇、派駐嚟台灣嘅日本代表喺街上面被人襲擊、被翻版製造商反狀告佢地製作翻版碟、同日本人合作有啲咩留意嘅地方等等...
對於當時仲未了解清楚成個業界架構嘅小弟嚟講，老闆左哥嘅呢啲分享令我對呢個行業有唔少改觀，詳細內容因為涉及太多範疇，要解釋起上嚟唔係咁容易，呢度恕小弟唔方便盡錄。但綜觀以上幾個分享，相信大家都會了解到，同日本人做生意真係要非常小心，而且仲有唔少規矩要嚴格遵守；另外就係如果你嘅「正當生意」影響到某啲人嘅利益嘅時候，麻煩就自然會搵上門。
（店內售賣嘅商品都有IPPA授權貼紙，授權喺台灣國內販售）
（基於成本原因，店鋪售賣嘅AV碟包裝都比較簡約，但都係正版授權商品。）
事隔三年，小弟再次登門拜訪，難得事務繁忙嘅左哥仲對小弟有印象，左哥分享佢過去呢幾年嘅經歷，形勢已經冇以前咁差，店鋪亦都有專業嘅團隊確保運作暢順；而日本方面喺台灣亦都已經設立好分部，一直從法律途徑去追訴翻版製造商。情況已經慢慢變好，當然，仲可以變得更好。
喺店鋪逗留咗兩個鐘頭，聽咗唔少業界嘅內幕，又得到咗唔少經營嘅心得。嚟緊8月台北成人展，小弟已經約好左哥會再次登門拜訪，希望到時會聽到更多正版AV喺台灣發揚光大嘅好消息。
（Beauty Venus VII嘅三位主演女優，為台灣嘅正版店鋪宣傳。）
呢一篇文並唔係啲咩工商，而係小弟發自內心，佩服喺台灣為日本正版AV業界打拼嘅每一位同仁；賣AV賣到生命受到威脅，除咗講出嚟不可思議之外，相信亦已經唔係普通人能夠接受到嘅程度。身為支持正版AV嘅海外一份子，希望無論喺日本、台灣、香港，正版AV發展嘅道路，未來會一片光明。
店鋪地址：中正區八德路一段43巷12號1F
FB Page: https://www.facebook.com/profile.php?id=100064275121843
沒有留言:
張貼留言