(原文於21-3-2023 hksecretparty刊登
https://hksecretparty.com/2023/03/21/三上悠亞引退，你有覺得可惜嗎？/)
2023年3月13號夜晚7點，S1專屬女優三上悠亜宣布即將喺今年八月推出最後一套作品，喺三十歲嘅生日月份，結束佢八年嘅業界生涯。
關於三上悠亜八年嚟嘅作品，我會等所有作品都推出哂之後做一個總結同個人推薦。今次呢一篇文章主要係想同大家分享一下我喺呢幾日所觀察到，坊間對於「三上悠亜引退」呢件事嘅反應；以及嚟到2023年，當一個AV女優宣布引退之後，大家嘅諗法同以前會有咩唔同。
今次呢篇文章會比平時寫嘅更加傾向個人觀點分享同沉悶，希望大家唔好介意。
SSIS-663 引退発表 126日後にAV女優をやめる三上悠亜
先講講三上悠亜嘅引退宣言內容，當中佢本人有陳述佢引退嘅原因，主要係因為身體支撐唔到拍攝工作嘅辛勞，雖然作為專屬女優，佢每個月都只需要拍一套作品就可以坐埋一邊等收錢，但長達八年每個月定時定候嘅工作對於佢嘅身體都係一種負擔，再加上佢本人喺過去幾年積極向唔同範疇發展，以上種種原因都令到佢決定離開呢一份做咗八年嘅工作，正式脫離現役AV女優呢一個身份嘅標籤。
在我觀察嚟睇，三上悠亜喺2017年拎到最優秀女優賞之後，其實就已經奠定咗佢喺AV業界無人可以複製嘅地位同成績；爬到上最高嘅等級，成為業界入面萬人景仰嘅傳奇AV女優，每個月收嘅片酬係好多企劃單體女優辛勞工作嘅幾倍甚至幾十倍，名利雙收之餘仲有一大堆嘅海外工作邀約，簡直係每一個AV女優夢想嘅生活同前景。
當年三上悠亜以無人能敵嘅氣勢同聲勢，奪得DMM ADULT AWARD 2017 最優秀女優賞。
TEK-067 Princess Peach 三上悠亜
以上嘅成績相信佢本人同經理人公司一早已經預見得到，而三上悠亜本人明顯志不至此，AV女優嘅身份無錯可以為佢帶嚟更多嘅名氣同收入，但成為一個最Top嘅AV女優只係佢嘅第一步，佢嘅目標係成為下一個潮流界、時裝界、化妝品界嘅女皇，能夠同昔日嘅前輩明日花キララ睇齊，甚至超越，先係佢一直以嚟嚮往嘅目標。
所以由幾年前開始，明顯已經睇得出三上悠亜喺AV業界嘅極限已經到咗，佢本人亦都慢慢將工作重心轉移去其他地方，搞偶像組合進軍南韓，創立自己品牌嘅時裝同化妝品，雖然偶有失敗嘅案例，但再接再厲，喺AV業界以外大展拳腳，以三上悠亜呢個大名進軍各個市場，先係佢最渴望嘅舞台。
喺過去幾日坊間嘅討論入面，有唔少人都有將三上悠亜嘅引退，同佢早一兩個月之前同一個19歲嘅Youtuber合作呢一件事掛鉤，有唔少人都認為係因為三上悠亜識到新男朋友，所以決定收山唔再拍片，但容許小弟喺呢一度為三上悠亜平反：嗰一條合拍片只係佢地兩個人嘅商業合作，並唔係坊間八卦記者所講嘅「三上悠亜識咗新男朋友」，所以三上引退呢件事同呢位年青Youtuber理論上係一啲關係都冇。
另一樣我觀察到嘅係對於三上悠亜嘅引退，坊間唔多人有「可惜」嘅感覺。喺過去當我地睇到一個AV女優宣布引退，唔多唔少都會有一種「以後都冇機會睇到佢新片喇」嘅失望感，但三上悠亜咁多年嚟嘅AV作品評價，大部份人都係覺得失望居多，導致有呢種失落感嘅人唔多，大家只係有「反正都拍得唔好睇，早啲收山都冇所謂」嘅反應。
作為一個Top界別嘅AV女優，拍出嚟嘅AV所收穫嘅評價竟然係低到大家覺得無咗都唔可惜，坊間有呢一種逆向嘅反應都實屬罕見。
三上悠亜喺2022年啱啱慶祝完出道六週年。
22年高橋しょう子引退，23年三上悠亜引退，兩位傳奇級數嘅女優相繼離開AV業界，但大家嘅留戀感覺已經冇以往咁強，我認為唔多唔少都同新人輩出有關；喺疫情嘅呢三年時間，經濟衰退之下令到唔少日本女仔投身風俗業，輾轉之下成為下海拍攝AV嘅一員。喺呢一個幾乎每日都有新人出道嘅年代，少一個一線女優，第二日就已經有十個新人嚟俾你過目，填補你嘅空虛。
雖然未必每一個新人都啱口味，但隨住時間嘅流逝，舊人嘅感覺同回憶只會越嚟越稠淡，新人帶俾我地嘅衝擊亦會越嚟越強，搵到新嘅替代只係時間問題。就好比失戀分手之後最好嘅療傷方法，搵下一個對象嚟填補空缺，傷口自然就會痊癒。
其次係喺近年，AV女優就算喺引退之後，都仲有唔少地方有機會見到佢嘅身影，例如近年都有唔少女優喺宣布引退嘅同時開設FANS Club，一手一腳由自己打理。除咗可以避免俾事務所分一杯羹之外，仲可以自己掌控尺度同價錢，同時仲可以喺引退後都繼續保留到嚟自一班死忠FANS每個月嘅穩定外快收入。FANS就算收到引退消息，都唔需要擔心以後冇機會再見到心愛嘅女優嘅消息同靚相，甚至乎仲會有再搞見面會嘅可能，喺呢一方面都大大降低咗FANS對於女優引退之後嘅空虛感。
所以嚟到2023年，當我地睇到一個AV女優宣布引退，就算有冇心理準備都好，我地心中泛起嘅波瀾已經冇以前咁大同震驚。或者我地唔會咁快就搵到一個可以取代佢嘅位置嘅女優，但第二位第三位嘅席位，依然大把選擇；睇一睇FANS Club嘅帖文，原來引退之後嘅佢今日去咗一間好靚嘅餐廳食嘢，望到佢掛喺臉上面幸福嘅笑容，原來引退，都唔係一件咁hard feeling嘅事。
三上悠亞嘅引退，象徵住一個AV時代嘅終結，未來又會有下一位皇者女優揭竿而起，安慰大家寂寞嘅晚上；面對一個女優嘅引退，我地心入面當然會有不捨，但江山自有人才出，傳統AV要追上時代嘅步伐同迎合觀眾越嚟越高嘅口味，自然就要一代接一代嘅淘汰同換血，先至會有顯著嘅成長。就好似如果一個城市嘅娛樂圈萬年不變，大家仲會睇到進步嗎？
喺呢一刻，我已經開始期待聽日宣布出道嘅新人了。
沒有留言:
張貼留言