(原文於14-11-2024 hksecretparty刊登
https://hksecretparty.com/2024/11/14/冇錯就係仙氣，但要點樣先可以影出av女優嘅仙氣？/)
去完一大堆event返嚟之後，執相永遠係令我又愛又恨嘅一個環節，愛嘅當然係因為可以再一次欣賞到各位AV女優嘅美態，透過自己嘅鏡頭影低嘅美照，就算影得差都好，都係一個好難忘嘅回憶；至於恨，就當然係執相嘅過程執到自己眼都就嚟盲，影得少又覺得好似蝕咗，影得多返到嚟淨係揀相都揀到手軟。嗚呀，做AV女優Fans真係辛苦。
暫時嚟講，小弟都去過唔少大大小小嘅日本AV碟鋪，隨住去得多影得多，喺攝影技術同執相方面最近都開始見得下人。今次就同大家分享一啲我去AV女優event嘅時候，一啲攝影上嘅心得同技巧，各位攝影大師對以下內容應該會嗤之以鼻，但希望我嘅經驗可以令各位新手初哥行少啲冤枉路，俾各位一啲相機設定上嘅參考。
（上次喺福島裕二老師嘅攝影體驗班上面影嘅香水じゅん。）
首先係器材方面，之前喺「去AV女優event前做足準備：用品篇」都有提及過，如果手上有相機嘅話，都會強烈建議大家用相機去影，出嚟嘅效果會比起手機好。如果只有手機嘅話，請打開人像模式，事後執相嘅時候，喺調較膚色、景深等等嘅時候，都會更加容易做到想要嘅效果。
（秋葉原嘅書泉係我經常較錯白平衡同偏色嘅event場地，事後只能夠儘量追返當時女優嘅膚色，圖中嘅女優係小野六花。）
喺焦段方面，因為嚟event用手機影嘅參加者都仲係佔大多數，所以大部分店鋪都唔會將你同女優嘅距離set得太遠，我自己觀察通常20-40mm左右嘅鏡頭焦段都已經相當足，去到50mm或以上就會變咗影大頭，半身都未必影得晒，甚至乎你已經企到最後，50mm你都仲會覺得太近，所以要用定焦鏡頭嘅話，50mm以下我個人就認為已經相當夠用。
（身材均稱同埋比例好嘅女優，影全身會更加好睇，圖中嘅女優係松本いつか。）
（至於胸前雄偉嘅女優，影橫倒嘅半身相會有唔錯嘅效果，圖中嘅女優係恋渕ももな。）
喺閃光燈方面，大部份店鋪喺event場地都會提供充足嘅燈光，除咗正常嘅天花板光管之外，仲會喺左右另外打兩盞大燈埋去做補光，所以無論你係用手機定係相機，除非set錯光圈快門ISO，唔係嘅話照正常影應該唔會出現under嘅情況。
當然我亦都見唔少參加者會自帶閃光燈去影嘅情況，主要係補足返部份場地射燈cover唔晒嘅地方，亦有一啲情況係用閃光燈打落女優塊臉，會有更好嘅效果，呢一方面就睇個人需要。最近我都思考緊要唔要整返盞環型閃光燈，喺女優個眼珠入面做影出環狀燈嘅效果，又係一門需要深究嘅攝影學問。
仲有一個情況有閃光燈補光會更好，就係女優踎低坐低嘅時候，因為兩邊嘅射燈多數只會照到女優嘅上半身，當女優一踎低咗，兩邊嘅射燈就cover唔到，呢個時候閃光燈就可以發揮佢嘅作用。但女優踎低坐低通常都係忽然之間嘅事嚟，事前亦都唔會知佢會唔會忽然有呢個舉動，所以要唔要帶埋閃光燈上陣，帶咗又有冇用得著嘅機會，有時都要講下運氣。
（女優如果踎低咗，光線會大打折扣，可以睇到背景已經俾我事後拉爆咁濟，但人臉依然唔夠光，呢啲就係因為女優踎低而導致光線cover唔到嘅情況，圖中女優係宮西ひかる。）
（黑肉嘅女優，用閃光燈都可以有唔少幫助，呢張係冇用閃光燈嘅效果，圖中女優係乙アリス。）
ISO方面，大部分店鋪用400-1000都已經相當足夠；快門大概係1/125-1/160，呢個速度已經彌補埋因為見到女優而手都震埋嘅情況，快門再上我個人覺得冇太大必要，女優本人轉pose亦都冇快得咁交關；光圈視乎個人喜好，我個人習慣用大光圈，如果鐘意影全身多啲，收細少少光圈出嚟效果當然會更好。
（表情豐富嘅女優，大光圈都會有唔錯嘅效果，圖中嘅女優係八木奈々。）
角度、取景、構圖，呢啲都係比較因人而異嘅偏好，我都係慢慢摸索緊自己鐘意嘅方向。最正常見到嘅當然就係女優喺相嘅中間，影橫倒嘅話，女優企喺相嘅左右兩邊配合埋背景，有時會有唔錯嘅效果；角度方面儘量做到同女優嘅眼神平視，唔少女優都係160cm左右嘅身高，唔適宜將相機放得太高，會變咗用高抄嘅方式影落去。有時如果女優坐低/踎低嘅時候，我都會跟住一齊踎低，平排嘅視點影出嚟會有更加理想嘅效果，女優都唔駛用仰視嘅角度去望你。我甚至仲試過瞓喺地下度影女優，個女優活潑啲，你都要跟住一齊活潑，玩得先開心同投入。
當然如果你鐘意呢種居高臨下嘅視點，就唔好理咁多，行埋少少影落去啦！
(至於個角度要攞到幾高又或者幾低，就視乎你想要影到點樣嘅效果，要影長腿同底褲就當然只能夠低抄，圖中女優係新ありな。)
擒高又擒低，為嘅只係影到自己女神嘅美貌。唔同朋友去女優event嘅目的都唔同，有人為嘅係簽名、有人為嘅係嗰張合照、亦都有唔少人好似小弟咁，鐘意返嚟對住嗰堆相，執到又愛又恨。無論邊個原因都好，工欲善其事，必先利其器，喺呢短短兩三分鐘嘅過程，如果準備充足啲，發生問題嘅機會都會少啲。至於一啲臨場嘅補救同執生，好難喺度一次過講晒出嚟，唯有靠經驗同急智去補足。
去見AV女優，都仲有好多嘢要學習呢。
沒有留言:
張貼留言