喺東京逗留一個月，可以見到幾多個女優？Part 9

由禮拜二開始連續兩日半都冇event啱去於是就決定買張最近加咗價嘅JR東京廣域周遊券，喺呢三日去遠啲嘅地方睇下



第一日計劃去嘅地方係去日光影紅葉，每日只有一班新幹線由新宿出發直達日光，出返嚟東京亦都只有一班喺下晝2點左右嘅班次所以如果諗住玩到好夜先走嘅話，就只可以選擇轉車轉到頭都暈埋嘅方式返東京

除咗日光之外，離日光大概45分鐘車程有一個地方叫鬼怒川温泉，入面有一條好出名嘅吊橋我都想去睇下於是當日嘅行程就係喺日光影完紅葉之後，就過去鬼怒川温泉影吊橋，再喺嗰度坐最後一班車返嚟東京。

喺新宿上車坐咗兩個幾鐘頭終於到達目的地東武日光駅



喺車站出面有唔同嘅巴士去日光嘅各個景點，第一站係上去離車站有概15分鐘車程嘅二荒山神社:




（連添香油都可以電子支付）

而喺二荒山神社旁邊，就係東照宮同埋輪王寺，三個景點合稱「二社一寺」：

參觀完寺廟拜完神之後就可以選擇沿路行路行返落車站，沿途可以睇到好多好靚嘅風景:



（喺香港好似永遠都睇唔到呢種會令人心情變好嘅藍天白雲。）

行到落車站大概需要30分鐘，喺附近食咗個鰻魚飯，就搭另一架巴士開始上山沿途會經過玩過頭文字D街機嘅朋友一定識嘅いろは坂，係上山同落山嘅必經之路:

又搭咗一個鐘頭巴士，最後終於嚟到目的地，竜頭の滝:



竜頭の滝啱啱好最近就係紅葉盛開嘅時間，由落車嗰刻開始，周圍都見到紅葉嘅蹤影:



喺山上面只係逗留咗一個鐘頭左右就去等巴士落山因為落山都要唔少時間，而且巴士只要一滿人就唔會停站俾人再上車，直至有人㩒鐘落車為止，所以大家如果有機會去嘅話，一定要預早時間落山同埋要有等幾班巴士先上到車嘅心理準備

呢啲地方唔係自己揸車嚟其實真係好唔方便

喺落山嘅過程，我諗成架巴士入面只有我一個人會對住嗰廿幾個髮夾灣係會覺得好興奮完完全全就係玩頭文字D街機嗰陣見到嘅場景，邊個位可以跳崖，邊個位過灣之前仲有段S路，全部記憶都返晒嚟

今次只係搭巴士體驗落山嘅過程，但沿途嘅路段加埋景色真係好靚，有機會真係要試下自駕遊落山。


（架巴士未開始落山就已經滿晒人。）

落到山都已經係接近6點，天都已經黑晒，出發去鬼怒川温泉嘅電車要等45分鐘，1930先至到達鬼怒川温泉，而尾班車返去東京係2029開出即係話我逗留喺鬼怒川温泉嘅時間只有短短嘅一個鐘頭



呢個時間基本上都冇咩遊客會再入去呢啲鬼地方，所以搭車嘅人多數都係當地嘅居民，沿途經過嘅車站都係非常冷清:




終於嚟到鬼怒川温泉駅，即刻用9秒9嘅速度行過去條吊橋度，因為來回都要接近20分鐘一陣趕唔切返嚟就冇車返東京

呢一條就係傳說中有啲靈異嘅鬼怒楯岩大吊橋:






全條吊橋大概只有100米唔夠，好快就行到去對面，但因為夜晚真係完全冇燈，只可以自己開住電筒慢慢行。

咁夜撞到唔理係人又好定係鬼都好，都咪話唔驚


（行去吊橋沿途都係咁嘅「景色」，但喺吊橋附近反而有好多酒店。）

然後就係回程，我需要轉4程嘅火車先返到民宿附近:


（呢個即係宇都宮站。）


最後是日10點幾先食嘅靚晚係松屋嘅麻婆豆腐燒牛肉套餐

禮拜三繼續拎住張pass有咁遠搭到咁遠不過朝早首先要落去秋葉原先又要排隊買嚟緊嘅event飛


（今日嘅呢四張飛都係同一間片商嘅女優。）

今日嘅目的地係東京嘅避暑勝地，輕井澤





雖然12點幾先喺上野出發，但因為今日嘅車程短過尋日好多，一個鐘頭左右就到，所以都冇咩點影響到本來嘅行程

落咗車首先去醫肚先，輕井澤比起日光同鬼怒川温泉方便好多，車站隔離除咗有個大outlet之外，仲有個有唔少嘢食嘅food court:






（呢間好似真係中國人開，聽到店員之間係用普通話交談）

食飽飽就開始今日嘅冒險之旅上網睇啲人講推薦喺輕井澤租架單車「自駕遊」，周圍踩去睇風景好似都係一個幾有趣嘅體驗

喺outlet同food court嘅另一邊就係觀光區，有一間租單車鋪，一日¥1,300，上網睇以前一日只係¥500:


（單車係電動嘅，冇踩過電動單車嘅朋友可能要啲時間適應。）

店員喺你租車嘅時候會話俾你知有咩要注意，例如唔好踩出馬路，有邊啲觀光區域唔可以俾單車入，踩去某個景點大概要幾多時間等等，仲俾埋張細地圖你，相當貼心


（租車嗰陣同個員醒傾咗幾句，佢話你哋香港人唔習慣喺市區踩單車，嚟到呢度成日都出意外）

離開咗車站範圍之後就開始進入輕井澤嘅舊區同郊區，除咗一樣周圍都係紅葉之外，因為好多有錢人都有喺度起別墅，偷窺觀摩下呢啲別墅都係行程之一:



（有錢人嘅部落。）

輕井澤嘅教堂都係非常出名，都係打卡必到嘅地方:

之後就由舊輕井澤踩過去雲場池，又係另一個欣賞紅葉嘅好地方:




嚟到呢個時候太陽都差唔多要落山，1800要返去還車，仲有唔夠2個鐘頭，我決定踩去遠少少嘅中輕井澤，睇下有啲咩睇:



（我喺香港都踩慣馬路，不過冇頭盔都係有少少驚）

結果踩到過去已經完全入黑踩上山除咗驚蕩失路之外，仲驚中途會遇到有熊喺又係一個出名景點嘅星野温泉附近影張相就快啲起行返去還車


（你以為係餐廳？其實呢間係地產鋪嚟。）

踩單車自遊行仲有一樣嘢好，就係見到想停低嘅地方可以隨時停，例如好似呢間夜晚燈光好靚嘅餐廳咁:



沿途仲見到有間輕井澤朱古力鋪，入去打卡之餘仲買咗幾盒朱古力，嚟緊嘅event除咗有香港拎過嚟嘅手信送俾女優之外，仲有啲特色嘢加碼啪啪啪:


（一盒600円，到時仲可以扮晒嘢咁同啲女優講我專登去輕井澤買俾你架）

最後係啱啱好1800之前返到嚟還車喺outlet度兜咗個圈就出發返東京了:


（輕井澤outlet真係有啲大，我淨係WIndow shopping都行咗一個鐘，慢慢睇慢慢揀嘅話真係要差唔多大半日。）


（同埋可惜試唔到呢個輕井澤車站好出名嘅便當，聽講又係一個必試嘅美食嚟）

繼續是日靚晚時間，今晚食嘅係朋友推介我去試下嘅吉列牛，喺秋葉原嘅Yodobashi有分店:


（牛カツ京都勝牛 ヨドバシAkiba店 東京都千代田区神田花岡町1-1 ヨドバシAkiba 8F）

除咗普通set之外仲有大set嘅供應，我會建議大家揀大set嚟試，因為要食齊佢建議嘅咁多種食法嘅話，一份牛真係唔係太夠:




（我呢個係一份普通牛。）

而我個人最鐘意嘅係醬油+wasabi嘅配搭，冇諗到咁樣搭出嚟好好食:


（咖哩反而係非常普通。）

（每一枱都會有個細爐仔，店員上菜嘅時候佢會問你要唔要點著佢，作用係煎一煎啲牛令到個質感再唔同啲，會食到脆皮嘅感覺，幾好玩）

之後就拖住疲乏而滿足嘅心情返民宿了

嚟到觀光行程嘅最後一日，過埋今日就要回歸返每日都去見AV女優嘅幸福生活不過今晚都仲有一場event要去，所以喺外面都唔可以玩到太夜，日落之前就要起程返嚟

今日本來嘅計劃係去河口湖搭纜車同影逆富士，一朝早梳洗完換好晒衫諗住㩒張新幹線飛嘅時候，竟然同我講冇飛最快book到嘅班次要去到下晝1點，真係入一入去就出返嚟

既然係咁就索性改地方，即刻上網查下張JR Pass包埋嘅地方有啲咩可以一日遊，最後決定去「越後湯澤」，今次唔理咁多㩒埋張回程劃位飛先，至少唔駛驚返嚟冇位坐

只係我冇估到，呢個咁突發嘅安排，差啲搞到我連東京都返唔到嚟。


（因為之前兩日嘅新幹線飛我都可以即日㩒到，所以河口湖呢程冇提早預約到係我自己柒咗，大家記得至少都要一日前就好㩒定啲車飛。）

前往越後湯澤大概要坐一個鐘頭嘅新幹線，喺火車上面我嘗試臨急抱佛腳，即刻睇下有啲咩好去處，發現可以搭巴士上去一個叫「苗場飛龍滑雪場」嘅地方上面搭纜車秋天雖然冇雪，但佢哋都會開放架纜車俾人上去影紅葉，纜車來回都係3600円，好似幾吸引

但因為真係冇plan過嘅關係，好多時間上嘅嘢都冇夾過，嚟到越後湯澤我先發現要等一個鐘頭先有上山嘅巴士，睇睇個時間表去到個滑雪場都要差唔多下晝一點，都冇辦法啦


（又係我自己嘅小習慣，呢啲固定時間嘅巴士站時間表，我每次都會用手機影低，除咗拎嚟打個卡之外仲可以方便查時間，喺收唔到訊號上唔到網嘅時候，有機會救你一命。）

既然係咁一於又去醫肚先啦越後湯澤車站入面有個細細地嘅foodcourt，叫「Cocolo湯沢」，有賣嘢食同唔同嘅特產，有一個好出名嘅特大飯團，叫「爆彈おにぎに」。





一個特大飯團連埋細細杯嘅味噌湯，價錢係1000円，可以揀兩種餡料，我揀咗三文魚肉+魚子：


（同一個拳頭差唔多大，大細大概係喺便利店買到嘅飯團嘅兩三倍。）


（用筷子食仲方便過就咁拎起食，因為太大個。）


（除咗大飯團同飲清酒之外，呢度仲可以浸酒風呂。）

個飯團其實只係變大咗個份量，味道同普通飯團冇咩大分別嘅食飽飽都差唔多夠鐘上車，出發又去上山。


上到巴士嘅時候我先發現原來架車只係收現金，唔收西瓜卡，冇諗到喺呢啲遊客區都冇呢啲設備手上得返1000円左右嘅現金，日本嘅呢類巴士多數都係落車先俾錢，佢會因應你坐嘅距離，車費都會有唔同

一邊搭車一邊查下車費總共要幾多，搭到去目的地嘅滑雪場要700円，即係我手上呢1000円係夠俾啦冇問題冇問題

咪住...根據我過去兩日嘅經驗，呢啲山旮旯地方係唔會有便利店俾你㩒錢，如果我一陣上到山上面先發現冇便利店冇ATM，我咪冇錢搭車返落嚟...？

......金翅仆街鳥


（巴士上面會有呢啲找換機俾你兌換散紙。）

巴士繼續向住山上面前進，望住巴士入面顯示價錢個電子告示牌，我個心入面就越嚟越緊張

眼前我只係得返兩條路揀，第一就係搏一搏山上面真係有ATM，因為山上面有唔少旅館，有機會會有一啲相應嘅配套，那怕就算要行一公里先有一部ATM，都可以解決我嘅困境

第二個方案就係即刻落車，唔好再喺架車度，希望一陣俾完去程嘅車費之後，手頭上剩低嘅現金足夠我搭埋落山嗰一程；如果真係唔夠，就行到去下一個站，甚至下下一個站先上車，直到手上嘅現金夠俾呢程車錢為止



越諗就越對日本嘅荒郊野嶺冇信心，最後我決定壯士斷臂，放棄上山嘅念頭，即刻㩒鐘落車。

咁啱得咁橋，落車嘅呢個地方都係一個滑雪場嚟：





入去滑雪場問一問職員，冇俾我估錯附近果然係冇ATM嘅即刻數一數身上仲有幾多現金，手上只係得返唔夠700円，啱啱好夠cover落山嘅呢程車費。


（喺呢啲地方，有十張信用卡都唔夠有一張1000円紙幣嚟得令人安心。）

知道咗夠錢落山之後，個人個心都定啲，既然一場嚟到就既來之則安之，喺等落山巴士嘅呢短短半個鐘頭，喺呢個滑雪場嘅四周圍睇下：


（呢度上山嘅纜車都係有開嘅，但喺嗰一刻都冇心情上去了。）


（附近嘅一個細神社，入去拜拜嘅時候我真係誠心祈求，希望俾我安安全全咁落到山。）


（我㩒過Google地圖，如果我由呢個位置行落山，要行足足三個鐘頭。）

最後成功逼上落山嘅巴士，成功返到落越後湯澤站，即刻去附近嘅便利店㩒返啲現金喺手，成個人嘅心情先至放鬆返落嚟。


（呢個故事教訓我，下次去呢啲遠離大城市嘅地方，一定一定一定要帶備足夠嘅現金喺身。）

（越後湯澤又係一個小城鎮嚟。）

正所謂大難不死就必有後福，本來淨係諗住喺車站附近逛到夠鐘搭新幹線返去，俾我見到原來喺車站附近都有一個纜車可以搭上山，路程短啲，上網睇過風景都唔錯

既然塞翁失馬，我就俾自己調整一下心情，搭纜車上去睇下風景：



由纜車影出去，都可以影到好多好靚嘅風景，特別係已經開得七七八八嘅紅葉：

呢一個纜車車程唔太長，全程只有7分鐘，順利到達山頂，可以一眼睇晒成個越後湯澤嘅景色：





山上面仲有呢個短程嘅...呢個應該叫咩？重點就係免費，可以坐上去影到兩邊樹林嘅風景：





搭到落去會見到一個植物園，但因為仲要趕搭最後一班纜車落返山，所以今次就唔行入去了：

上同落都係唔駛錢嘅，於是又搭返上去，繼續影下兩邊嘅山景：





最後喺纜車站附近見到有免費嘅足湯，即刻唔理咁多，浸到上纜車前一刻先講





太陽落山，三日嘅短暫觀光之旅進入尾聲，又係時候返去我嘅主場見AV女優。

我係秋葉原人吖hi！

今日見嘅女優係Prestige嘅專屬女優，佢叫做野々浦暖（野野浦暖）


（當日event嘅黑色bikini。）

佢同涼森れむ係好朋友，之前仲曾經一齊搞過一個寫真展：



作品方面大家都唔難睇出佢係偏向瘦弱嘅女優，所以多數都係飾演俾人輪姦、強暴嘅設定；同埋我本來諗住佢嘅人氣應該唔會太差，點知我當日1900買飛，參加劵嘅no.係21號。

個event喺兩個禮拜前已經開始賣緊，亦即係話喺呢段時間佢只係賣到20張飛出去，咁樣嘅銷情以一個專屬女優嚟講係相當慘淡仲要當日秋葉原只有佢一個女優搞event，都賣到咁嘅成績真係愧對Prestige嘅列祖列宗

至於係咪真係咁差，我就留返俾大家判斷喇：

（佢平時Twitter啲相美肌又係好鐘意開到好重。）

我自己會用個「乾」字嚟形容呢一類女優，係除咗瘦之外，你覺得佢係食慾不振，發育不良先至搞到自己就嚟見骨咁濟；我哋喺成人台AV po成日笑Prestige啲飯盒係咪俾河合あすな一個人食晒，因為成個Prestige好似得佢一個係肥同有肉嘅

（涼森有時眼神又好迷，野野浦暖個人又keep住好乾，我有時甚至覺得佢哋兩個好姊妹係咪一齊嗰陣會take嘢當然只係講笑）

傾計都係冇咩特別，雖然冇人排隊，但都唔想好似專登想R水吹咁，淨係同佢講咗佢同涼森一齊影啲相好靚，佢又多謝多謝咁就完咗了

當日嘅靚晚係同啱啱今晚到日本嘅朋友食嘅磯丸水產：





三日嘅休息完結，正式繼續新東寶嘅東京AV女優event之旅

未完待續