2022年日本AV新法 懶人包

長話短說2022年6月14號，日本嗰邊就正式通過咗「AV出演被害防止・救済法」嘅法案，以下我地簡稱「AV新法」

雖然係別國內政，但其實對於仲鐘意睇日本AV嘅朋友嚟講，呢個AV新法嘅實行係對正常AV又好，無碼市場又好，都會帶嚟唔少改變同衝擊，小弟就整理咗一個小小嘅懶人包，同埋一啲業界行內人士嘅睇法，等大家對於未來嘅日本AV變化，有一個心理準備

呢個係成條法案嘅全文：
https://kouzaisakifan.com/tegalog/tegalog.cgi?postid=1

以下係AV新法嘅概要內容：



呢一個新法案主要提及以下幾點：

1. 呢條法案嘅對象並唔止係女優，係包括出演嘅所有人士，不論年齡同性別

2. 片商喺拍攝前需要提供一份出演契約，片商有責任向出演者詳細解釋拍攝嘅內容，亦需要保護出演者嘅拍攝安全

3. 喺簽署好合約之後，只可以喺指定嘅時間後進行拍攝，以及進行相關嘅後續工作：
- 簽署好拍攝合約嘅一個月後，先可以進行拍攝，可以將呢一個月理解為冷靜期
- 拍攝完嘅作品，包括作品情報嘅公布、預售、正式販售，只可以喺拍攝後4個月先可以正式開始
- 產品推出之前，需要俾有份參演嘅表演者確認入面嘅內容

4. 違反以上法則嘅話，出演者都有權無條件解除合約

5. 所有AV出演契約，喺AV作品公布後嘅一年後，都可以無條件解除，當中包括將作品落架。喺法例生效嘅頭兩年，呢個期限會係兩年。

6. 喺AV出演嘅演員，無需要承擔任何因解除合約而產生嘅賠償費用

 - - - - - - - - - - - - - - - - - - - - - - - - - - - - - - - - - - - - - - - -

然後我地睇睇業界人士嘅反應：

男優吉村卓就表示新法案會令到收入大減，佢甚至想喺嚟緊嘅夏季參選參議院，當然多數都係講笑。

女優田中ねね，喺6月10號新法案仲未表決之前，就已經收到事務所寄嚟嘅新契約書。

https://twitter.com/tanaka_neneSub/status/1535185994655248384?s=20

天使もえ表示，AV新法嘅通過只係會令到非正式嘅AV變得更加猖狂，呢度指嘅係無碼市場，亦即係大家熟悉嘅FC2。
而投身呢啲唔受規管嘅AV市場工作同拍攝，只會令拍攝者嘅處境更加危險同唔受保障，希望想入行嘅女仔諗清楚。

女優藤木紗英表示，簽訂合約之後一個月先可以開始拍攝，拍攝完4個月後先可以開始公佈同販售，即係足足要等5個月嘅時間。
去到發售嗰一日可能個女優都已經唔知去咗邊。

 - - - - - - - - - - - - - - - - - - - - - - - - - - - - - - - - - - - - - - - -

暫時可以睇到嘅係，因為拍攝同販售嘅條件變得苛刻，片商同事務所喺簽新人嘅時候都要非常小心，而且仲要好好照顧旗下女優嘅生理同心理需要，至少由簽訂合約開始5個月內，都要留得著個女優先

其次就係因為呢條法例係涵蓋所有出演嘅演員，包括男優女優，所以就算只要有一個演員表示唔OK要解約，可能成套作品都要報銷，成個拍攝都要暫停

另外，關於片酬同片約呢方面，而家業界offer俾專屬女優嘅多數係3-4個月嘅短約，未來呢一類合約嘅期間有機會會再縮短，甚至出現一啲拍片還拍片，宣傳還宣傳，兩份唔同嘅合約內容都唔定

最後就係因為由簽約到發售嘅呢段時間延長咗咁耐，有部分想投身AV產業嘅女仔有可能會轉戰無碼市場，因為出糧快，拍完就即刻有錢收，但同時因為無碼市場嘅AV唔受任何法律規管，出演者嘅安全同拍片後嘅保障都唔會受到保護，變相其實係令到參演者更加危險

之後就睇下事務所同片商會點樣「應付」呢一個咁大嘅轉變喇