上仙台搵涼森＋去田代島睇貓貓＋一日見晒水卜櫻空 Part 5

喺仙台嘅最後一日，今日安排嘅行程有啲chur，想試下喺入黑之前去晒仙台入面嘅動物園同水族館，如果仲有時間嘅想去埋松島海岸影日落

對於去旅行應唔應該要chur住去，每個人都有自己嘅取態，我自己覺得偶而chur 1-2日OK，日日都咁chur去完仲攰過返工，咁就好似失去咗去旅行嘅本意

一班人去旅行嘅時候，行程編排上冇可能滿足晒每一個人，所以我都prefer大家要有各自嘅me time，有一班人一齊吃喝玩樂嘅時間，亦有大家各有各玩嘅時間，唔需要每一日都痴埋一齊先至叫做「一齊去旅行」唔知大家又點睇呢


八木山動物公園 宮城県仙台市太白区八木山本町1-43

今日去嘅動物園叫做八木山動物公園，喺仙台站坐地鐵20分鐘左右就到。




呢一個動物園size唔算好大，550羊嘅入場費，大概可以消磨到兩個鐘頭，一家親子遊可以入嚟行下，情侶拍拖呢...又真係好似唔多見會有情侶拍拖會行動物園反而曖昧緊嘅男女會行動物園嘅比例好似多啲


（非常得意嘅狸貓）


（動物園外面嘅停車場影出去，晴空萬里，呢一個「地鐵站」亦係全日本海拔最高嘅地鐵站嚟。）

之後就去仙台嘅水族館，呢一個地方就比較遠，位置同我早幾日去嘅多賀城比較接近，喺一個叫中野栄嘅地方，JR站有接駁巴士入去水族館：


仙台うみの杜水族館 宮城県仙台市宮城野区中野4丁目6番地

（入場費就貴過動物園好多，2400羊。）

相比起動物園，我個人比較鐘意行水族館除咗一定係室內有冷氣之外，睇住啲魚游嚟游去，個人嘅心情都會變好


（一入館就係呢個勁大嘅魚缸，都有魔鬼魚，但佢冇食咗佢嘅同事）



（有時望住啲企鵝喺度郁都唔郁，會懷疑係咪真企鵝嚟...）

全日除咗酒店早餐之外就冇食過嘢，水族館今期係同「毒」呢個題材做聯乘展覽，喺小賣部會買到一啲幾得意嘅限定menu


（雞泡魚藍色雪糕，下面仲有粟米片墊底，味道唔錯。) 

食住雪糕等睇海豚表演，啱啱好趕得切睇到今日嘅最後一場：


（影呢啲海豚表演，最難係唔知隻海豚幾時跳上嚟，到你舉起部相機諗住影嗰陣，佢已經潛返落去）

同動物園一樣，呢個水族館都係大概消磨到2個鐘頭左右，所以嚟到仙台可以有一日嘅行程係一早起身去完動物園，再過嚟水族館，時間上係綽綽有餘

望一望個錶，仲夠時間入去松島海岸影日落，貴為日本三景之一，梗係唔可以錯過：





正常入嚟松島海岸嘅旅游方式，係坐觀光船圍住入面嗰十幾個島仔行一圈，但因為我入到嚟嘅時間已經太晏，啲觀光船4點就已經收晒工，所以只可以徒步去最大嗰個島入面行一圈：


（天公造美，影到唔錯嘅日落。）

經過呢條地標嘅松浦橋，就可以喺個島上面周圍行下，但因為島上面冇街燈，又就嚟入黑，我都唔敢停留太耐，行一個圈大概30分鐘就出返嚟：


（不過呢個時間入嚟...都係人影都唔多個嘅...）

喺仙台嘅最後一晚，我決定放縱一下用拉麵同牛脷嚟做晚餐，為我呢個仙台之旅劃上一個完美嘅句號：


だし廊 宮城県仙台市青葉区一番町2-2-11 TKビル 1F

だし廊係仙台其中一間著名嘅拉麵鋪，每日都會有唔同嘅限定menu，需要mon住佢個Twitter先知今日有咩特別嘢食；至於普通menu，我睇其他人推介就係呢個用幾種蝦煮出嚟嘅高湯「海老だし藻塭そば」，清得嚟又夠味，相當唔錯，最後我係連湯都飲埋



之後就係整多餐牛脷，同樣都係食浅野こころ介紹我食嘅牛たん 司，今次試下另一間會唔會有咩分別：



牛タン焼専門店 司 西口名掛丁 宮城県仙台市青葉区中央1-8-25 マジェスティビル２階




唔知會唔會係我唔識食，最後發現食落兩間都係冇咩分別嘅大家嚟到仙台可以揀間就腳嘅試下，相信只要係「牛タン焼専門店 司 」就係質素嘅保證。

就係咁，我喺仙台嘅呢五日行程，完滿結束。

未完待續