第二章: 快閃大阪36小時，人生最重要既一場包剪揼(18年1月)
2018年1月16號，開工無聊冇野做，碌緊Twitter既我見到飛鳥出咗一個咁既Tweet。
等咗幾個月，終於有event去喇
我好興奮吖.jpg
咦咪住...呢個event有兩個女優，隔離嗰個咁熟口面既...
有咩開心得過見一個自己鐘意既女優?
答案係一次過見哂兩個你最鐘意既女優，起雙飛。
睇到呢個Tweet既當下，我真係差啲就衝動遞信辭職，我知呢次如果我去唔到既話，應該會後悔一世。
兩個女優幾個月都冇一個event，一嚟就一次過齊哂兩個
我係咪發緊夢係既話唔該唔好叫醒我
過咗一陣個人冷靜落嚟，望一望個更表，整理一下個思緒。睇下先...20號本身係例假，前一日就收夜，射波射21號，早少少返嚟既話仲可以搵到診所攞醫生紙...
如果夜晚搭零晨機過去，活動11點開始，落機即刻去搭火車應該趕得切，不過間野喺邊呢...喺三重縣...係柏青哥鋪...
吓!? 柏青哥鋪!?
去過日本既各位，都知日本周圍都有呢啲柏青哥鋪，亦即係彈珠機鋪。有唔少日本人喺入面玩到傾家蕩產搞到妻離子散，靠玩彈珠機發到達既，又真係未聽過。
柏青哥鋪入面俾我既印象就係好嘈，仲嘈過香港啲機鋪，煙霧瀰漫，每一行機都有人食煙，同平時日本街頭聞到既清新空氣係一個超強烈既對比。
咁點解柏青哥鋪又會同AV女優扯上關係呢? 其實就好簡單，柏青哥鋪平時都會搵啲三四線既藝人、聲優、甚至運動員，嚟店鋪玩新機做直播吸引人氣，AV女優都係佢地其中一個邀請對象，都係吸引人嚟睇，有人流就自然有話題有生意。
而喺柏青哥鋪搞既event，同AV鋪搞既event，最大既分別就係觀眾唔係靠買AV嚟攞福利，而係靠玩遊戲嚟決定。而正正係咁，個參加門懢亦都低咗好多，任何在場既人都可以參加。
因為有太多玩法，呢度我就唔列舉出嚟，同埋之前奧運洗太平地既關係，好多柏青哥鋪都已經唔會再請AV女優，大家應該唔會再去到呢類event，有人有興趣既話我之後再講。
交返個鏡頭俾當時個腦打緊仗既我，16號睇到呢個消息，20號就係event，中間得返三日時間準備所有野，機票住宿交通等等...
好似睇緊啲外國劇咁，我彷彿見到右下角有個時間喺度倒數緊。冇估到連見女優，都要同時間競賽。
-- --
(喺Twitter叫春話想去既時候，飛鳥仲like咗我個Tweet，冇得走數啦。)
第一件事睇機票，當時好好彩20號零晨有一班廉航飛大阪，落機時間係當地朝早6點，仲要由機場出難波轉火車，我第一間要去既柏青哥鋪喺一個叫阿倉川既火車站附近。
由關西機場出發，我要轉3次火車，total坐兩個幾鐘頭，落咗車仲要再行大慨15分鐘，先至去到目的地。
我預計到達間鋪既時間係當日既朝早10:30，而途中如果一個唔好彩，飛機delay，又或者火車誤點，又或者中途我轉錯車，我就會Miss咗個event。
要知道日本啲火車唔係港鐵，唔係每一班車都會站站停，落遲一個站已經唔知自己去咗邊同點樣返去，淨係交通呢part已經要好小心。
然後當日要去既第二間柏青哥鋪，就喺另一個叫播磨既地方，同前一間鋪相差大慨半個鐘左右既路程，又係要搭火車轉兩程，出完車站再行多十分鐘左右先至去到。
(當時既planning大慨係咁，日本啲火車真係睇到人頭都大埋。)
如是者，當時淨係要搞清楚點去呢兩間柏青哥鋪已經用咗唔少時間，同時我又要mon住兩間柏青哥鋪既Twitter，睇下有冇進一步既event資訊，等我可以有個準備。
喺mon post既同時，我亦都有問過柏青哥鋪一啲當日既詳情，譬如駛唔駛去攞飛，如果有既幾點開始派，幾點可以入場之類。
我第一次感受到日本關西同關東人既分別就喺呢度，當日event第一間鋪既Twitter admin睇到我留言，專登用英文留言問我有冇野要幫手。
人間有愛
關西人真係好友善
(當時我先知由名古屋去係近好多，不過名古屋冇零晨機，最後都係維持原本計劃。
同埋，佢起初以為我係backpacker嚟![[sosad]](https://cdn.lihkg.com/assets/faces/normal/sosad.gif)
)
-- --
搞清楚event嗰邊既情況同交通之後，我就開始搞住宿同送禮既問題，因為我只係打算住一晚，第二日21號下晝就走，搵地方都唔係太難，最後喺大阪黑門市場求其租咗個床位就算。
最難搞既係禮物同封信，時間太急，已經冇咩心思去諗送咩好，嗰幾日都要返工亦都冇時間出去買禮物，最後我揀咗...
香港周圍都買到既，金莎
(當時諗住掯個背囊就行，又唔想拎住一袋二袋，所以都想輕便為主。
兩封信當時係緊急搵巴打幫手譯，我知你有mon住po不過唔想爆你名，多謝你。)
萬事俱備只欠東風，淨低可以做既只能夠祈求當日所有野順順利利。
我唔貪心，俾我用相機同對眼，望住佢地兩個企埋一齊就夠。
20號零晨出發，21號下晝返嚟，Total喺日本逗留唔超過36小時既瘋狂之旅，即將出發。
-- --
19號當日夜晚收工就去機場，求其食少少野之後就等上機。
第一關順利過渡，飛機準時起飛，當時情緒好緊張，都冇乜點訓。
訓下醒下又訓下醒下，準時到達關西國際機場。
搭火車出難波既途中開始天光，望住個咸蛋黃慢慢升上嚟，唔知點解我有種同時間鬥快既感覺。
嚟到難波站要換pass，當時條queue已經排咗唔少人，我一路排隊一路急，班車唔miss得架，快少少得唔得
攞到pass嗰一刻即刻衝落月台，響差唔多last moment上到火車。
望住窗外面既風景，諗返起成個過程好奇妙。
我竟然為咗兩個AV女優，去一個我聽都未聽過既地方。
諗下諗下中途訓著咗，差啲唔記得落車轉車
嚇到我鳩都縮
轉火車轉到頭都暈埋，同預期一樣，大慨10點半左右，到達第一間柏青哥鋪。
到呢一刻個人先至叫做放鬆少少，終於到喇！
-- --
位於阿倉川既呢間柏青哥鋪，算係比較大型既一間，一入到去就已經聽到一堆彈珠機嗰啲運作聲，現場又播住歌，不過好彩冇乜煙味，空間大抽風都好啲。
入去廁所gel gel個頭，執返啲眼耳口鼻，出返嚟個場就開始搵staff問一問啲問題。
(連廁所都有event既notice
)
響換禮物既counter搵到個reception姐姐，不出所料係唔識英文既，一輪雞同鴨講，最後都係要出動Google translate。
我主要係想知現場可唔可以用相機影，同埋我份禮可以點樣俾到佢地。
一級再問上一級，問到最後嗰個同我講，話可以完咗活動之後我親手送
我: 
> >![[bomb]](https://cdn.lihkg.com/assets/faces/normal/bomb.gif)
有得入後台咁盞鬼
今次仲唔留哂印象 ？
-- --
喺呢啲比較偏僻既地區，就算係普通AV鋪既event都好，有一個最大既好處，就係少人。
Event嚟講，少人既好處就係你每一個環節可以逗留既時間都會長啲，倒如Group攝影既時候，少人既關係Staff都會安排兩個兩個咁出去影，等個event流程唔會去得太快，望落冇咁冷清。而喺簽名既時候Staff亦都唔會點樣催你走，你可以傾耐少少，唔識日文都好你都可以望耐個女優多一陣，甚至你玩完唔夠喉見仲有位，仲可以俾錢買多round玩多次。
不過呢，個場好大既話，望落個場面冷清就冇辦法喇...
當時連埋我好似只有唔夠十個人喺現場，不過正如上面所講，少人有少人既好，玩遊戲贏既機會都大啲。
主持上台開始講開場白，我喺毫無困難既情況下就企咗喺第一排，主持講既成段野，基本上我除咗佢地兩個個名之外，我一個字都聽唔明。
11點過啲，我兩個老婆終於入場，我最期待既畫面出現了。
哇！仲要係殺戳都市Cosplay！
(如果要搵個接近既形容既話，應該係親眼睇到美斯同C朗同隊合作，帶俾FANS嗰種震撼。
開心都足以形容當時既感覺，應該係滿足。)
-- --
柏青哥event仲有樣好，就係任何時間都係任影相，不過又係唔可以拍片。
飛鳥已經係第二次見，比起第一次見既震撼已經少咗好多，但都係有種興奮既感覺。
等咗咁耐，終於第一次見到葵司真人，係比我預期中既更靚同上鏡，再加上今日呢套cosplay貼身得好緊要，個身材曲線走哂出嚟，再加埋嗰少少絕對領域，冇得輸，睇到我眼都唔眨。
能夠親眼睇到佢地兩個喺我面前同台，之前幾辛苦幾攰都好，呢一刻都抵返哂。
因為佢兩個講既內容我真係一個字都聽唔明，令到我更留心去留意佢地既交流同表情變化。
相比起飛鳥，葵司既表情多好多，亦都淡定啲，有種帶住後輩既感覺，飛鳥講野既時候葵司都會望住佢，驚佢唔識接又或者Deadair。
-- --
我好鐘意呢張飛鳥個表情，當時係葵司同主持講緊野，佢對住台下啲鏡頭擺pose。
葵司真人唔知點解有種可愛感，望落唔似大飛鳥六年，兩個拍埋真係有種兩姊妹既感覺。
Po多幾張全身相，葵司個腳型好靚。
由佢地兩個行入場開始，就有班唔知邊度走出嚟既阿叔，攞部電話出嚟影埋一份，好彩我企得前，唔係既話真係影人頭頂。
阿叔返去打柏青哥啦
因住輸死你吖
就喺我影到攰放低部相機，咁啱同飛鳥四目交投既時候。
飛鳥:
嗰一刻，佢既笑容世界第一。
我知道佢認得我了
-- --
講下笑下，終於開始到玩遊戲既環節。
獎品係咩呢？就係兩個人既簽名板，同埋同佢地兩個既合照。
玩法，係猜包剪揼，佢兩個會出同一個答案，只要猜得贏就得。
Total 10個名額，現場當時大慨有三十人。
嗰一刻我直頭係賭博默示錄個伊藤開司上身，腦入面飛過一大堆可能性，我未試過猜一場包剪揼係咁緊張。
(出咩呢出咩呢
...)
我嘗試打眼色望住飛鳥，吖佢又唔知諗緊乜，對眼飄咗去第二度。
將一生既運氣倒哂落去，我出剪！
「最初はグー！じゃんけんぽん！」(猜包剪揼之前講嗰句日文)
佢兩個同時出包，高舉勝利之剪既我，大獲全勝，主持叫台下贏既行埋一邊排隊，等上台影世紀合照。
媽我得咗喇
中途有一段小插曲，有一次佢地兩個咬耳仔商量出咩既時候，最尾出嚟竟然兩個都唔一樣。
葵司即刻笑住同飛鳥講做咩吖你
唔知係咪兩個夾埋，不過個氣氛即刻拉高返。
(第一位上台既係一位伯伯，嗯，伯伯睇呢啲刺激野，小心身體吖。)
到我上台既時候，飛鳥最先見到我，招牌笑容好靚，但我嗰一刻只係想近距離望下葵司。
近距離睇葵司，塊面好細好精緻，美人胚子既感覺。
同葵司講我係響香港嚟，佢都有「Er!?」果啲反應，咁都好 幾驚佢連呢啲反應都冇
後尾睇返張相先知,原來飛鳥有橋我手開心死當時個腦一片空白邊留意到
呢張合照我每次睇返都會心微笑，相片背後既回憶足夠我回味一世。
(唯一可以挑剔既係張簽名板係預先簽定，唔會寫你個名上去，不過是但啦
)
-- --
玩完遊戲皆大歡喜，之後係擺pose影相環節。
呢張係當日影幾百張入面，唯一一張葵司有望中我鏡頭
-- --
影完相就拜拜走人，Staff叫我跟住一齊出去，點知一出到去就已經唔知佢地行咗去邊
睇嚟係經第二個門口入返休息室
...
結果兩份禮就交咗俾一個類似助手既人
算啦有得上台合照我已經好心足
同埋原來仲有人送野 助手攞住袋黃色既袋寫住HABS
唔知咩牌子嚟
出到門口就停咗一架長橋車喺度，有幾個大叔同伯伯就揸住相機響度等佢地出嚟![[photo]](https://cdn.lihkg.com/assets/faces/normal/photo.gif)
小弟當然唔執輸等埋一份
(成件事幾揼本，成日聽人講柏青哥鋪背後係啲OO組XX組經營，睇嚟係真既。)
而喺等既途中，我就同之前喺Twitter度識到既一位日本葵司FANS相認咗，就叫佢做K叔叔先。
K叔叔追咗葵司都一段長時間，今次都係特登揸車嚟三重縣參加呢個event，後尾我先知佢係住靜岡縣附近，揸3個鐘頭車先嚟到。
同K叔叔溝通基本上每一句都要翻譯，吸收咗上次既教訓，我今次出發前特登喺電話set定個日文輸入法，好處係唔駛用語音，出嚟既result會準好多。
不過首先要同K叔叔解釋呢個app打完日文會轉英文淨係呢度都搞咗一陣
(我個人經驗，Google Translate日譯英係準過日譯中，不過之後都係試過一次大炒車。)
而之前喺Twitter度話Event當日會幫我手既柏青哥鋪Staff，喺我等緊佢地出嚟既時候終於出現，係一個哥哥仔店員嚟，佢之前去過兩年美國，識講簡單英文，不過有啲句子都係要用翻譯app先搞掂
佢話第一次見葵司飛鳥都覺得佢地好Kawaii，我老婆s就梗係靚啦
我都有讚佢地鋪頭安排得好好
嘉賓同台下觀眾都睇得好開心
然後我問佢係咪會經常響柏青哥店搞呢啲AV女優活動 佢話又唔係經常，唔算好密![[banghead]](https://cdn.lihkg.com/assets/faces/normal/banghead.gif)
可能真係因為佢果度太偏僻
食風食咗兩粒鐘，都仲未見到佢地兩個出嚟既跡象，後來有Staff出嚟架車度拎野，有其他FANS過去問佢地幾點出嚟，Staff話2點10分左右
但係第二場3點就開始,等得嚟就趕唔切去第二場
因為兩個場中間仲要搭半個鐘火車，中途又要轉車
當時已經1點50分左右，K叔叔話可以車埋我，我話我買咗Rail Pass，婉拒咗佢既好意
之後K叔叔一枝箭就上咗車，揸車去第二場。
我就默默地行返去個火車站 當時仲係全日冇食過野
淨係飲咗半枝寶礦力
-- --
由阿倉川去播磨，中間要坐兩程火車。
(鐵路都要養老)
(由火車站出去，沿路都係呢啲景色，柏青哥鋪嗰種現代感反而有啲格格不入。)
嚟到會場啱啱好3點多啲，一入到去已經開始緊，今場多返啲人。
-- --
第二場都係同一套衫，不過佢地兩個就調返轉左右企，都算係叫做有啲新意。
傾計內容唔知係咪都係同上一場一樣，因為我一句都聽唔明
然後又到咗玩遊戲環節，我當然想再下一城攞返個perfect ending，上一場K叔叔冇贏到，今場佢都講明好想贏好想上台影合照。
又係繼續玩包剪揼，伊藤開司賜我力量！
-- --
第一鋪同佢地打和但因為呢場人多，已經有5個人贏咗，剩返5個名額。
第二鋪我同K叔叔都贏，但贏既人夾埋多過5個，結果又要猜多輪，
第三輪，我同K叔叔一齊出包，一野搞掂，我地兩個即刻嚟個high-five一切盡在不言中
K叔叔排前我一個，佢一上台葵司就認得佢，影完相佢地仲傾咗幾句。
到我上台嗰陣我又一次無視咗飛鳥葵司就同我講「第二次你都贏埋喎！」
當刻好想同佢講，為咗你，我猜到手斷都得。
(呢張影得好過上一場嗰張，不過葵司隻手遮住咗佢自己個樣。)
-- --
呢一場既遺憾係我真係冇同飛鳥講過一句野本身學咗好耐冇見既日文都唔記得咗講影完握咗手我就走咗落台
之後又係擺pose影相時間。
有啲pose好好笑，主持想佢地有啲姊妹feel，結果變成咁。
一調返轉就正常好多。
最鐘意係呢兩張，好有feel，不過多咗隻手。
-- --
跟住就響大家都以為吹雞完場既時候,主持人話葵司有啲野要同大家講
大家:
葵司:
主持人:
葵司
原來兩個都係天然呆嚟
飛鳥1月8 號生日，當日事務所就準備咗個蛋糕同佢補祝，本身係驚喜嚟，不過葵司就可能緊張得濟唔記得咗。
全場一齊唱生日歌，我又哼埋一份，同AV女優慶祝生日，真係可遇不可求。
飛鳥心入面OS：減緊肥唔食得...
-- --
最後葵司叫大家繼續支持葡萄同睇葡萄當時喺Abema TV既節目。
飛鳥唔知講咗啲咩 聽唔明
完場之後就出返去架橋車度影相。
(呢幾張臨時臨急用手機影，出嚟效果差啲。)
講漏咗，當日全日都有兩個黑鬼保鏢跟出跟入。
我知大家諗緊咩不過唔係你地諗嗰啲，呢兩個只係老臨嚟，配合返個活動既感覺，佢地響個會場都係舉下牌叫人唔好拍片諸如此類。
點解我咁肯定？因為我返嚟之後過咗幾日，見到佢地又出去呢啲鋪頭活動扮嘉賓保鏢，個嘉賓唔係女優嚟。
總之我話唔係就唔係啦
活動完哂，K叔叔趕住返去，同我講完保重就走咗
冇錯 呢句保重我都係翻譯咗先明
我就趕返大阪又要搭火車
上到回程火車先feel到自己有幾攰，通宵飛機直落冇休息過，全日一路冇食野，直到呢一刻先至可以放鬆落嚟。
但睇住手上呢兩張野，我發夢都識笑。
今次有嚟真係太好喇
當晚沖完涼撻落床就訓著咗，之後第二日都係迷迷糊糊咁上機返香港。
當時我同自己講，去完呢次真係有今生冇來世，以後啲event唔去都得
有邊一個event可以抵得到呢次？
只係隔咗3個月，4月我又一次飛過去，今次又係去見邊個呢？下回分解
延伸閱讀：
序1 無端端點解會走去追AV女優 + 序2 AV Event的前世今生
沒有留言:
張貼留言